By:

السلام عليكم متابعي Creative Geek أهلاً بيكم في درس جديد
إنهاردة هنعرف 10 طرق فعالة لتوفير مساحة فاضية في الديسك C

نبدء علي بركة الله:

*الكلمات المائلة بين نجمتين هي تعبير يدل علي نوع الكائن المطلوب (زر ، إختيار في قائمة ، ملف).

1 شغل الـ Disk Cleaup:
// أحد الطرق السهلة واللي مش محتاجة أي برامج ، فقط بضعة ضغطات علي الماوس:

ـ روح للديسك C ودوس عليه كليك يمين وإختار Properties *إختيار قائمة*

ـ دوس علي Disk Cleanup *زرار*

ـ هتستني شوية عقبال ما يخلص حساباته XD

ـ هتحدد أنواع الملفات اللي عايز تمسحها وتدوس Cleanup System Files *زرار*
ـ دوس Ok *زرار*

2 البرامج عديمة الفائدة:
// طريقة تانية لتفريغ الديسك C وهي بحذف البرامج اللي واخدة مساحة كبيرة وتسطيبها في أي ديسك مختلف:

ـ في الـ Control Panel تقدر تدوس من فوق علي Size عشان يرتبلك البرامج حسب حجمها من الكبير للصغير ولاحظ إن بعض البرامج مش بيتعرف علي حجمها وبالتالي بيعتبره صفر! ، إحذف البرامج الكبيرة وسطبها تاني في ديسك مختلف.
3 إيه اللي واخد المساحة أصلاً؟:
// مفكرتش, هو إيه اللي واخد المساحة أصلاً؟:
ـ في الطريقة دي هتحتاج برنامج Disk Analyzer تقدر تحمله من هنا .
ـ هتفتح البرنامج وتختار الديسك اللي إنت عايزه وتدوس Scan Drive *زرار* هيظهرلك الحاجات اللي واخدة المساحة الأكبر مرتبة تنازلياً.

4 تقليل الحجم المتاح لنقاط الإستعادة:

// نقاط الإستعادة بتتعمل عشان لو الويندوز حصله حاجة وإنت بتسطب برنامج مثلاً تقدر تتراجع عن التغييرات اللي حصلت وترجع الويندوز لتاريخ محدد ، فيه ناس متعرفشهاش ولا بتستخدمها وبالتالي هي مضيعة للمساحة:

ـ دوس كليك يمين علي أيقونة الكمبيوتر This PC/Computer وإختار Propeties *إختيار قائمة*

ـ من الشِمال إختار System Protection *إختيار*

ـ حدد الديسك C من القايمة اللي في النُص

ـ دوس علي Configure *زرار*

ـ إتحكم في المساحة المتاحة لنقاط الإستعادة من المؤشر اللي تحت.

ـ من فوق دوس علي Disable System Protection *إختيار*

ـ دوس علي Delete *زرار* عشان تمسح نقاط الإستعادة الموجودة بالفعل (ويندوز 10)

5 إستخدم برنامج Ccleaner:

// إستخدام البرنامج ده لمرة واحدة كل شهر هيوفرلك مساحة مش قليلة:

ـ البرنامج بيحذفلك أي ملفات مؤقتة موجودة علي الجهاز ويقدر يلاقيلك الملفات المكررة لكن متزودش إستخدامه عن مرة كل 3 أسابيع عشان ميقللش آداء الجهاز وإحرص علي عدم تركه يعمل في الخلفية.

حمل البرنامج من هنا

6 تشغيل ضغط الملفات:

// طريقة بتقلل آداء الجهاز وبتاخد وقت طويل أثناء تطبيقها لكن يمكن إستخدامها في الأجهزة ذات المواصفات العالية وقت الضرورة:

ـ دوس كليك يمين علي الديسك C وإختار Properties *إختيار قائمة*

- علم صح عند Compress this drive to save disk space *إختيار*

- دوس Ok *زرار*

7 توسيع حجم الديسك C:

// ممكن تاخد مساحة من أي ديسك تاني وتضيفها للـ C

ـ في الطريقة دي هنستعمل برنامج Partition Wizard حمله من هنا . (حمل الـ Free Edition)

ـ شغّل البرنامج ومن جواه دوس كليك يمين علي الديسك C وإختار Extend *إختيار قائمة*

ـ حدد الديسك اللي عايز تاخد منه المساحة.

ـ من الشريط حدد المساحة اللي عايز تاخدها.

ـ لما تحدد دوس Ok *زرار* ومن فوق دوس Apply *زرار*

ـ هيقولك يستحسن تقفل كل البرامج دوس Yes *زرار*

ـ إستني شوية XD

ـ هيطلب منك تعمل Restart أو تعمل Cancel ، دوس Restart *زرار*

ـ هياخد وقت ، متقلقش لو لقيته طول ، قطع الكهربا أثناء العملية كارثة مجربتهاش الصراحة XD 😂 

8 حذف ملفات المتصفح المؤقتة:

// طبعاً ملفات المتصفح المؤقتة بتاخد مساحة كبيرة وبالتالي يوجب حذفها بإنتظام كل شهر أو شهرين:

ـ هنتناول هنا طريقة حذف ملفات Google Chrome المؤقتة.

ـ دوس علي القائمة من فوق وإختار الإعدادات.

ـ من تحت دوس عرض الإعدادات المتقدمة.

ـ تحت "الخصوصية" دوس محو بيانات التصفح *زرار*

ـ علّم عند الصور والملفات المخزنة مؤقتاً.

- دوس محو *زرار*

9 إلغاء التجزئة:

// طريقة تزيد من آداء الهارد بشكل فعال بجانب توفيرها للمساحة:

ـ تقدر تستخدم الطرق المدمجة مع الويندوز أو تستخدم برنامج خارجي وأنا أُفَضِل الأخيرة.

ـ لو هتستخدم برنامج خارجي فأنصحك بـ Smart Defrag حمله من هنا .

ـ لو هتستخدم طريقة الويندوز دوس كليك يمين علي الديسك وإختار Properties *إختيار قائمة*

ـ من فوق إختار Tools وبعدين دوس علي Optimize *زرار*. (ويندوز 10)

ـ هنا تقدر تحدد أي ديسك وتدوس Optimize *زرار*.

10 إيقاف تشغيل خاصية الـ Hibernate:

// الخاصية دي تعتبر عديمة الفائدة خصوصاً للناس اللي اجهزتها بطيئة ، تحديداً الهارد بتاعهم بطيئ وبالتالي إيقافها ممكن يوفر مساحة تصل لـ 3 جيجا! :

ـ شغل الـ CMD كمسؤول (إبحث عنه من Start)

ـ إكتب الأمر التالي لإيقاف الخاصية:

powercfg /hibernate off

ـ لو عايز تشغل الخاصية دي تاني إكتب الأمر ده:

powercfg /hibernate on

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

​

ده اللي كان عندي إنهاردة ، لو عندك طرق تانية شاركنا بيها في الكومنتات ، من فضلك متنساش تعليقك ولو بكلمة شكر والسلام عليكم