Turn into A Geek
ملحوظة: توقف العمل علي هذا الموقع بشكلِِ نهائي
هذه المقالة برعاية جروب عرب جيجابايت
السلام عليكم متابعي Creative Geek وأعضاء Arab GB أهلاً بيكم في موضوع جديد
By: Ahmed Taha & ARAB GB Facebook Group
إنهاردة هنعرف إيه هو كسر السرعة وإيه البرامج المطلوبة لكسر سرعة كارت الشاشة وشروط وطريقة الكسر والأضرار المحتملة ، قبل ما نبدأ إتأكد إنك تقرا المقالة كلها بعدين تنفذ اللي فيها
نبدء علي بركة الله:
1 إيه هو كسر السرعة ؟:
مقولتش صحيح XD هي السرعة حاجة مادية عشان تتكسر؟ XD لالا إسمعني D: كل بروسيسور بيكون له عدد معين من الدورات يقدر يعملها خلال الثانية ، العدد ده معروف بإسم التردد وبيتقاس بالجيجاهيرتز GHZ ، كسر السرعة بقي هو إنك تزود الرقم ده بحيث تحصل علي آداء أعلي بدون مقابل D:
بالطبع العملية دي معقدة شوية وليها أضرار في بعض الحالات ولكن كل شئ هيتم شرحه بإذن الله.
2 إيه هي البرامج والحاجات المطلوبة؟:
البرامج المطلوبة حجمها مش كبير متخافش XD
1 MSI Afterburner.
ده هو البرنامج الأساسي اللي هنكسر بيه السرعة D: حجمه 40 ميجا بإذن الله
شرح تحميله هيُذكر بالصور في الخطوات الجاية ، تابع معايا
2 برنامج نقيس بيه الـ FPS.
في الشرح ده هنستخدم برنامج RivaTuner Statistics Server وده برنامج جاي مع البرنامج الأول وإن شاء الله كل حاجة هتتشرح بالتفصيل.
3 لعبة تقيلة بالنسبة لجهازك.
شوف أي لعبة عندك شغالة تقيلة شوية عشان تعرف تلاحظ فرق بعد الكسر ، شوف لعبة تكون شغالة علي 20 فريم مثلاً ، في الشرح ده جربت لعبة Layers Of Fear علي كارت GT 610.
4 MSI Kombustor.
وده البرنامج اللي هنعمل بيه Benchmark عشان نتأكد إن الكارت مستقر بعد الكسر وده إختياري مش لازم تحمله.
3 التجهيز لكسر السرعة:
1هنبدأ بشرح تحميل وتسطيب البرنامج MSI Afterburner
أدخل علي اللينك بتاعه من هنا أو من فوق
تابع الصور
من موقع البرنامج دوس Downloads من فوق وحمل البرنامجين المشار إليهم في الصورة أو حمّل البرنامج اللي علي اليسار فقط دون الآخر.
2 شروط ومعلومات أساسية قبل البدء:
1- توفير تبريد كويس ومش شرط يكون تبريد إحترافي أو تبريد مائي ، لا عادي ممكن يكون هوائي بس متخليش درجة الحرارة تزيد عن 43 درجة مئوية في الاجواء الباردة وإنت مش مشغل أي لعبة.
2- لازم يكون عندك كارت علي الأقل GT 610 أو كارت AMD 5450 فيما فوق.
تعديل هام : دوس هنا عشان تِظْهِرُه
3- لازم تكون عارف إن كسر السرعة ده نتيجته مش مضمونة ، قصدي إنه ممكن يديك فريم أو إتنين زيادة وممكن يديك لغاية 10 فريمات زيادة لكنه مش هيحول كارتك القديم لكارت تاني يعني XD
4- الشرح ده تم تطبيقه علي أكتر من جهاز لكن مجربناهوش علي لاب توب
وإنت فاتح البرنامج تابع الصور
عشان تقدر تشاركنا بالصور اللي هتصورها هتعمل الآتي بالترتيب ده
1 دوس علي العلامة دي
2 دوس من فوق علي Screen Capture
3 حدد الزرار اللي عايزه يصور اللعبة بالضغط عليه من الكيبورد
4 حدد صيغة الحفظ وأنصحك بـ JPG
وفي الآخر إختار المسار اللي هتتحفظ فيه الصور ودوس OK
4 خطوات كسر السرعة:
شوف الصورة:
أول 3 إختيارات اللي هما Core Voltage و Power Limit و Temp. Limit إياك تلعب فيهم إلا لو عارف كويس إنت بتعمل إيه ، أنا مش مسؤول عن أي حد هيغير حاجة فيهم.
أنا إخترت تزودها بالارقام دي بالذات لإنها بتشتغل مع أغلب كروت الشاشة لكن ممكن تقلل الأرقام عن كدة لو واجهت مشاكل
بعد ما غيرت الإعدادات (ومش لازم تختار الرقم بالضبط يعني ممكن قبله واحد أو بعده واحد مش هتفرق) متدوسش علي علامة (صح) دلوقتي! ، لو دوست من غير قصدك دوس علي الزرار اللي شبه الريستارت ده عشان ترجع الإعدادات زي ما كانت.
1 اللعبة اللي قلنا عليها في الحاجات المطلوبة... إفتحها دلوقتي وشوف الفريمات كام وإحفظها في دماغك كدة XD
2 مش لازم تقفل اللعبة ، إرجع للبرنامج ودوس علي علامة (صح) عشان تفعّل الكسر.
3 دلوقتي إرجع للعبة وشوف الفريمات زادت كام وإنت وحظك XD
4 خطوة إختيارية مستحسنة : التغيير حتي الكمال:
بعد الكسرفي البرنامج إبدء زود الـ Core Clock ، زودها مثلاً 20 زيادة ودوس صح وإرجع للعبة إلعبها شوية كدة ييجي 3 دقايق وبعدين إرجع للبرنامج تاني وزود شوية كمان ، لما تلاقي حاجة من اللي هنذكرها في الأضرار المحتملة ظهرت يبقي رجّع الكسر شوية واقف هناك D:
5 الأضرار المحتملة:
متقلقش من كسر سرعة كارت الشاشة إلّا في الحالات الآتية:
1 درجة حرارة الكارت أثناء اللعب وصلت 70 درجة أو أعلي ودي في الواقع تعتبر الحالة الوحيدة اللي ممكن كسر السرعة يضرك فيها لإنه هيسبب ضرر للكارت علي المدي المتوسط.
2 كسرت السرعة زيادة عن اللي يقدر الكارت يستحمله وفي الحالة دي كل اللي هيحصل إن الجهاز هيتشنج خالص ومش هتعرف تحرك حاجة فيه ، ساعتها إعمل ريستارت والجهاز هيفتح ولا كإن حاجة حصلت XD
3 ظهرت حاجات غريبة في اللعبة حاجة غريبة؟ 😂 أيوة شوف الصورة دي
الصورة من لعبة Layers Of Fear علي كارت GT 610 مكسور السرعة +100 MHZ علي Ultra
شايف الخطوط والحاجات السودة دي؟ دي بسبب كسر السرعة والحل هنا إنك تدوس علي علامة الـ Reset في البرنامج عشان تلغي كسر السرعة وترجع الحاجات لأصلها وتقدر تلعب اللعبة اللي بتظهر فيها المشكلة دي ، يعني مش بتيجي في كل الألعاب.
4 اللعبة آداءها بقي قليل أو مش راضية تشتغل وفي الحالة دي إحذف برنامج MSI Afterburner وبرنامج RivaTuner وشيل حكاية كسر السرعة من دماغك.
لو عايز تشوف تفاصيل زيادة عن الموضوع ده دوس هنا
6 سؤال وجواب:
1 هل كسر السرعة بالطريقة دي هيأثر علي عمر الكارت؟
= لا ، طالما مغيرتش قيمة الـ Core Voltage يبقي خليك مطمئن.
2 هل لازم كل مرة أفتح البرنامج عشان اكسر السرعة؟
= أيوة لازم XD
3 لازم كل مرة أعمل الإعدادات تاني؟
= لا مش لازم ، في البرنامج هتلاقي شوية أرقام كدة 1 2 3 4 5 جنبهم زرار Save صغير ، إعمل الإعدادات ودوس علي الزرار الصغير ده وإختار رقم من الأرقام اللي جنبه D: وبس كدة XD
4 ممكن أخسر حاجة لو طبقت الشرح غلط أو كسرت السرعة زيادة؟
= لا ، غالباً هتطلع سليم من أي غلطة ممكن ترتكبها ، لو أي حاجة واجهتك بسبب كسر السرعة تقدر تنزلها علي جروب عرب جيجابايت وهرد عليك مجرد ما أشوف البوست
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ده اللي كان عندنا إنهاردة ، لو واجهتك مشكلة في تطبيق الشرح نزلها علي جروب عرب جيجابايت وهتتحل إن شاء الله ، لو عندك إقتراحات شاركنا بيها في الكومنتات ، من فضلك متنساش تعليقك والسلام عليكم