By:

السلام عليكم متابعي Creative Geek أهلاً بيكم في موضوع جديد

By: Ahmed Rabea
إنهاردة هنعرف ليه ويندوز 10 بيستهلك كل الكمية دي من الرام.

نبدء علي بركة الله:

لو عندك ويندوز 10 أكيد لاحظت من الـ Task Manager إن الـ System واخد نسبة غير طبيعية من الرام ، دي حاجة حلوة علي فكرة ، عارف إنك مستغرب دلوقتي XD ، عشان تفهم ليه هو واخد النسبة دي وليه دي حاجة حلوة لازم تفهم ويندوز 10 بيتعامل مع الرام إزاي وبالتالي لازم تعرف إزاي ويندوز 8.1 و 7 بيتعاملوا مع الرام هما الآخرين.

1 ويندوز 7 و 8.1 بيتعاملوا إزاي مع الرام؟:
إنت دلوقتي عندك مكان كبير فاضي في الرامات ، بتبدأ تملاه ببرامج ، لما الرام تتملي أو بمعني تاني لما تفتح برنامج جديد بيروح الويندوز شايل من الـ Ram أي برنامج بقالك فترة مش بتستعمله ويسحبه للـ Swap Ram

// الـ Swap Ram المعروفة بالـ Pagefile هي أماكن في الهارد موجودة إفتراضياً في الديسك C وتقدر تتحكم بحجمها (شوف آخر المقال عشان تعرف طريقة التحكم بيها)

وبالتالي بيفضي مكان في الرام للبرنامج الجديد ، عشان كدة لما تكون راكن برنامج لفترة وتيجي تستعمله تاني هتحس بتقل شوية في الأول.

2 ويندوز 10 بيتعامل إزاي مع الرام؟:
بالرغم من إن ويندوز 10 لسة بيستخدم الـ Swap Ram إلا إنه بقي بيستخدمها بشكل نادر نظراً للوظيفة الجديدة فيه ، لما الرام تبدأ تتملي بيروح الويندوز يضغط البرامج اللي علي الرام زي ما بيحصل مع ملفات Zip و Rar ، صحيح إن ده بيستهلك من البروسيسور أثناء الضغط والفك لكن تكلفة الآداء أقل بكتير جداً من الطريقة المستخدمة في ويندوز 7 و 8.1.

عملية سحب البرامج من الرام للهارد بتكلف وقت قليل جداً لكن إستعادتها من الهارد بتاخد وقت طويل لكن البرامج لما تفضل في الرام فك ضغطها هيكون سريع لإنها متحملة علي الرام أصلاً

يعني البروسيسور هيستلم الشغل من الرام ويرجعه عالجاهز XD
3 تقدر تعمل إيه بخصوص الإستهلاك ده؟:
في الحقيقة إنت مش محتاج تعمل حاجة ، قفل البرامج لتوفير الرام معناها وقت أطول لإعادة تحميلهم في حال عايز تستخدمهم تاني ، طالما جهازك شغال سريع ، الإستهلاك العالي للرام حاجة كويسة D:

عارف إن كلامي غريب XD

أياً يكن ممكن تواجه فرامل في الآداء فوررجوعك لإستخدام برنامج راكنه شغال بقاله فترة لإن البروسيسور ساعتها بيكون شغال علي فك ضغط البرنامج ، إليك بعض الحاجات اللي ممكن تعملها للتخلص من المشكلة دي.

ـ شيل البرامج اللي مش بتستعملها كتير وإحتفظ بتسطيبها في مكان آمن تقدر تفتكره وسط الزحمة XD.

ـ زيادة راماتك لـ 6 جيجا أو أعلي هيمنع ضغط البرامج اللي عليها.

ـ إقفل تبويتات المتصفح اللي ملهاش لازمة أو البرامج الغير مستخدمة.

ـ إعمل ريستارت للجهاز ومتسبهوش شغال لأكتر من يومين خصوصاً لو بتعمله Sleep بدل Shutdown.

4 إزاي تتحكم في الـ Pagefile:

ـ دوس كليك يمين علي Computer وإختار Properties

ـ من الشمال دوس Advanced System Settings

ـ  عند Performance دوس Settings

ـ من فوق إختار Advanced

ـ تحت Visual Memory دوس Change

ـ عشان تقدر تتحكم بيهم شيل علامة الصح من فوق

ـ هتحدد الديسك اللي غنت عايزه وتعمله الإعداد المناسب

 System Managed معناها إنك تسيب الويندوز هو اللي يحدد براحته.

5 في الآخر:

متقلقش من إستخدام الرام العالي ، دي حاجة كويسة زي ما قلت ، الويندوز بس بيعمل كل اللي يقدر عليه عشان يشتغل بأكبر سرعة ، حاجة كمان ، في موبايلك الأندرويد لو البروسيسور بتاعه شغال كويس ، بلاش تقفل كل البرامج المفتوحة من الـ Recent Apps طالما مش هيسببوا مشاكل لإن وزي ما قلت قفل البرامج مش هيعمل أكتر من زيادة وقت إعادة تحميلها علي الرام ، بس كدة D:

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

​

ده اللي كان عندنا إنهاردة ، لو عندك إقتراحات شاركنا بيها في الكومنتات ، من فضلك متنساش تعليقك والسلام عليكم