السلام عليكم متابعي Creative Geek أهلاً بيكم في درس جديد
إنهاردة هنعرف 3 خطوات لتحسين أي صورة في الفوتوشوب.

(تنبيه: الشرح ده مخصص للمبتدئين يعني المحترف ميجيش يقول إيه التفاهة دي) 

نبدء علي بركة الله:

نفتح الفوتوشوب ونسحب الصورة اللي إحنا عايزينها عليه

1 Curves:
دوس من الكيبورد علي Ctrl + M هيطلعلك نافذة فيها خط مايل من اليمين فوق للشمال تحت وورا الخط ده فيه زي بيان كدة ، عشان الصورة تبقي مضبوطة لازم البيان ده ميكونش فيه أماكن فاضية علي الجنبين من تحت. (صورة 1)
- لو لقيت البيان مسحوب كله ناحية الشمال وفيه مساحة فاضية ناحية اليمين معني كدة إن الصورة غامقة ، من الخط المايل هتسحبه من النقطة اللي فوق ناحية الشمال لغاية ما توصل لأول طرف من البيان. (صورة 2)
- لو البيان فيه مساحة فاضية علي الشمال معني كدة إن الصورة فاتحة أوي ، إسحب الخط من النقطة اللي تحت في الشمال إلي ناحية اليمين عند أول طرف للبيان. (صورة 3)
- لو فيه مساحة فاضية علي الجنبين إسحب الإثنين
- لو فيه حاجة زي الجبل ناحية الشِمال ، جرب تسحب من نص الخط لفوق شوية وروح ناحية الشمال (صورة 4)
- لو لقيت تراكمات تحت ناحية اليمين ، إسحب من نص الخط لناحية طرف البيان (صورة 5)
2 Color:
الألوان :D دوس من الكيبورد علي Ctrl + B هيظهرلك نافذة فيها 3 شرايط أو Sliders ، هتشوف إيه اللون القوي اللي موجود زي في صورة البوست كدة كان اللون القوي هو الأخضر ، هتقلل الأخضر بسحب الشريط الأوسط ناحية الشِمال ، وتزود الأزرق لو إحتاجت بسحب الشريط السفلي ناحية اليمين. (صورة 6)
3 Sharpness:
هتدوس علي قايمة Filter من فوق وتروح علي
Sharpen
ثم
Unsharp Mask 
إلعب في الإعدادات وشوف الأفضل
الفلتر ده بيشوف فين المناطق المضيئة (الفاتحة) ويشوف فين بتتقابل مع مناطق مظللة ويظلل الجزء اللي بينهم ، بمعني تاني بيزود وضوح تفاصيل الصورة